السلام عليكم و رحمة الله و بركاته
مقال اليوم كتبته بناء على استفسار العديد من الأمهات عن تقديم البازل لأطفالهم
اولا ما اهمية البازل للطفل؟
البازل من اهم الانشطة التي نقدمها للطفل لتنمية مهاراته فهو يساعد على التفكير المنطقي و حل المشكلات و زيادة الانتباه و التركيز و الادراك للاشكال و الاحجام و مطابقتها و تقوية عضلات اليد الدقيقة.
و له الكثير من المستويات التي تلائم الطفل في اعمار مختلفة.
متى نبدأ بتقديم البازل للطفل؟
يمكن تقديم اول بازل للطفل من عمر 9 اشهر حتى سنة.
ما هي مراحل تقديم البازل؟
قمت بتصوير طريقة تقديم البازل الصحيحة وفقا لمنهج المنتسوري وستجدون شرح الخطوة اسفل كل صورة.
1 - نضع البازل أمامنا على سجادة العمل.
2- باستخدام السبابة والابهام نقوم بالامساك بمقبض البازل ورفعه في شكل أفقي.
(مسكة الكماشة ).
3- نرفع قطعة البازل بشكل افقى كما بالصورة باليد اليسرى
و باستخدام اصبعي السبابة و الوسطى في اليد اليمنى ندور دورة كاملة حول الدائرة.
4- نبعد اليد اليمنى عن البازل ثم نقوم بتكرار الخطوة السابقة مرة اخرى .
5- نضع قطعة البازل على السجادة ثم نمر بنفس الأصابع على الفراغ المخصص لها .
6 - نمسك الدائرة بنفس الطريقة المذكورة سابقا ونضعها في المكان المخصص لها.
7 - نعرض على الطفل تكرار النشاط بنفسه.
ملاحظات:
بنستخدم الطريقة دي مع اي بازل.
بنكرر الشكل ولما الطفل يتقنه ننقل للي بعده
المفروض مفيش كلام يتقال أثناء تقديم النشاط لكن ممكن من وقت للتاني تكرري على الطفل اسم الشكل
والحمد لله انا استخدمت الطريقة دي في تعليم جنى الاشكال الهندسية واتعرفت عليهم بسهولة.
مراحل تقديم البازل
أولا بازل من شكل واحد
ولازم يكون بمقبض
بنبدأ زي الترتيب الي في الصورة
دائرة
مربع
مثلث
لأن ده الترتيب الأسهل على الطفل في الاستيعاب
البازل الي في الصورة أنا الي عملاهم من الفوم و الكارتون
و المقبض دبوس منظور
ممكن بعد كده نقدم بازل دوائر متدرجة في الحجم وده مناسب من عمر سنة
المرحلة الي بعدها بعد ما الطفل يتقن الأشكال المنفردة ممكن نقدم بازل فيه مجموعة أشكال هندسية
و بردو يكون بمقبض
البازل ده أنا جبته بدون مقبض
وعملتله مقبض من دبابيس المنظور
بازل بمقبض عدد أشكال قليل
رسمتها بسيطة الى حد ما
و الرسمة الي تحت بتساعد الطفل لو سنه صغير يتعرف على المكان المناسب بسهولة أكتر
بازل بمقبض
عدد القطع أكثر
و مفيش رسمة تحت قطع البازل بيشكل صعوبة أكبر للطفل
بعد ما قدمنا البازل الي كل قطعة فيه بتمثل حاجة واحدة
هنقدم البازل الي بيتجمع القطع مع بعض علشان نكون شكل
بنبدأ بقطعتين ثم 3 قطع ثم أربعة وهكذا
كل ما الطفل يتقن مستوى ننتقل للي بعده
و ده بازل من قطعتين ومن ثلاث قطع أنا الي عاملاه
و بنقدم شكل واحد و لما الطفل يتقنه نقدم شكل تاني
و لما يتقن الاتنين
ممكن نقدم الشكلين مع بعض و الطفل يبدأ يجمع كل بازل لوحده
وبعد كده ممكن نقدم 3 أشكال و4 أشكال في نفس الوقت.
بازل من ثلاث قطع و لكن بدون مقبض
بازل لتعلم الكسور
بازل بدون مقبض
نبدأ بالأشكال البسيطة مثل المجموعة التي على اليسار
ثم ننتقل للأشكال الأكثر تعقيدا مثل باقي الأشكال في الصورة
لم تتقن جنى بعد المجموعة التي على اليمين مثل تكوين جسم الانسان
ولكننا نتدرب عليها
بازل الطبقات
و هوعبارة عن مجموعة من البازل ترتب فوق بعضها
وأعجبتني فكرته كثيرا حيث يساعد الطفل على تصنيف الأشكال وفقا للونها في البداية
ثم تجميع كل لون لتكوين الشكل
لم أقدمه لجنى بعد
وهكذا تزداد صعوبة البازل و عدد قطعه كلما كبر الطفل.
ملاحظات:
لو قدمتي للطفل بازل صعب على سنه هيسبب له احباط و مش هيعرف يعمله علشان كده مهم تعرفي الطفل في أي مرحلة وتتدرجي معاه .
التنوع في البازل مهم علشان الطفل بيمل بسرعة,
بيقدم له أفكار وخبرات جديدة,
أنا باستخدمه في التعليم يعني لو بنتعلم عن الطيور أو الحيوانات أو وسائل المواصلات باستخدم البازل كوسيلة مساعدة خاصة ان جنى مهتمة بيه.
انتهت تدوينتنا اليوم
وألقاكم قريبا في تدوينة جديدة
و السلام عليكم ورحمة الله وبركاته
زوجة وأم وصيدلانية مهتمه بالتربيةوالتعليم بنظام منتسوري .. ، ، ،
1 التعليقات :
كنت عايزة اسالك المقبض ده اعمله ازاى...هل الدبوس المنظور غير دبوس الخرائط؟؟...وازاي اخليه أمان ميجرحش الطفل؟