السلام عليكم و رحمة الله و بركاته
مقال اليوم مترجم من موقع ask dr sears ببعض التصرف مني
و بيتكلم ازاي نشجع السلوك الجيد في الطفل الدارج
مين فينا مش بتعاني من نوبات الغضب مع اطفالها الي عمرهم فوق السنة؟
المقال ده بيقدم 13 طريقة للحد من نوبات الغضب و تشجيع السلوك الجيد
1- وفري للطفل درج خاص في المطبخ
املي الدرج ده لعب و حاجات مختلفة الطفل يستكشفها و يلعب بيها و غيري الحاجات دي كل فترة.
2- سيبيه يستكشف بأمان
و فري للطفل أنشطة زي صب المياه في الحوض بتاع المطبخ أو طبق بلاستيك
خليه يلعب بالأرز الني او اي حبوب لو مفيش رمل متوفر في البيت.
3- وفري أثاث مناسب لحجمه الصغير
الاثاث المناسب لحجمه هيشجعه يقعد وقت اطول يشتغل مع نفسه، ممكن يرسم او يعمل اي نشاط
ممكن تحطيله درجة بلاستيك قصاد الحوض علشان يقدر يوصله بنفسه بسهولة يغسل أيده و اسنانه و يساعد ماما في المطبخ.
4- أعيدي تنظيم يومك علشان يناسب طفلك
تغيير نظام يومك اسهل عليكي من تغيير تصرفات طفلك، ظبطي جدولك و يومك على أساسه علشان متفضليش في صراع طول اليوم.
5- السلوك الجيد أثناء التسوق
لازم قبل رحلة التسوق الطفل يكون واخد كفايته من النوم ، واكل كويس ، خدي معاك اي وجبات خفيفة مغذية.
ممكن تشيليه في البيبي سلينج او قعديه في عربية التسوق و حاولي تخلصي تسوق بسرعة
لو مستعجلة اوي متاخديش الطفل معاكي.
6- التخطيط
معظم الأطفال بيكونو في افضل احوالهم الصبح اول ما يصحوا، و بيكونوا في اسوأ احوالهم في فترة بليل او قبل معاد القيلولة.
لو وراكي خروجة أو أي مشاريع اعمليها في الوقت الي بيكونوا كويسين فيه.
7- توقعي مود طفلك
وفري الأكل قبل ما يبدأ يجوع، و العبي معاه ألعاب هادئة قبل معاد نومه.
8- الروتين الثابت
الأطفال بيتصرفوا احسن اما بيكونوا متوقعين ايه الي هيحصل في يومهم ، فحاولي تثبتي روتين ليومك.
9- برمجي الطفل انه يتأقلم مع يومك
بالرغم ان الطفل مش جهاز هنبرمجه، لكن الروتين بيخلي الطفل يتعود على نظام اليوم ، فاليوم بيمشي بشكل احسن .
10 - عقل مرتاح و معدة شبعانه
لو عندك معاد او مقابلة مهمة و هتضطري تاخدي الطفل معاكي احرصي انك تديه قدر كبير من الاهتمام و الرعاية قبل المعاد ، خليه ياخد قيلولة من نصف ساعة الى ساعتين قبل الخروج ، اديله وجبة خفيفة قبل ما تخرجي ، خدي معاكي شوية ألعاب جذابة للطفل و في نفس الوقت هادئة .
الحاجات دي هتخلي الطفل اكثر هدوءا اثناء المقابلة.
11- شجع السلوك الجيد للطفل في وقت اللعب
كل ام بتعرف ايه الحاجات الي بتخلي طفلها يتصرف بشكل كويس و ايه الحاجات الي بتخليه يبدأ نوبات الغضب.
احرصي ان وقت اللعب بتاعه يكون مليان بالحاجات الي هتخليه يتصرف كويس.
اسألي نفسك هو هيلعب ايه و مع مين و امتى.
12- تجنبي الألعاب الخطرة
السيارات المعدنية و الألعاب البلاستيكية الثقيلة ممكن تكون أمان لو الطفل بيلعب لوحده لكن لو معاه طفل تاني ممكن تكون مصدر خطر لو طفل حدف بيها التاني.
في حالة الأطفال اقل من 3 سنوات لو هيلعبوا مع بعض يبقى نوفر لهم ألعاب سوفت متسببش خطر.
13- اشغلي الطفل الي عنده ملل
الطفل الزهقان سبب لكتير من المشاكل.
حاولي تملي وقت طفلك سواء هتلعبي انت معاه او هتوفريله انشطة يقوم بيها لوحده او هتخليه يساعدك في البيت.
الطفل من 14 الى 18 شهر هيحب انك تشاركيه وقته لفترات طويلة،
الي اكبر من كده هيبدأ يشغل نفسه بنفسه و الموضوع هيزيد تدريجيا كل ما الطفل يكبر.
ممكن كمان تخلي الطفل يساعدك في اي اعمال منزلية ، هيخليكي تنجزي ابطأ شوية بس ارحم كتير من أنك تتعاملي مع طفل زهقان.
المقال الاصلي
http://www.askdrsears.com/topics/parenting/discipline-behavior/good-behavior-toddlers
زوجة وأم وصيدلانية مهتمه بالتربيةوالتعليم بنظام منتسوري .. ، ، ،
