#المشكلة_فينا_مش_فيهم
نيجي لثالث مشكلة كتير امهات بتعاني منها بعد السنة الاولى من عمر الطفل
و هي ان الطفل مبقاش بياكل
عايش على الرضاعة و بس
المشكلة دي من اكتر المشاكل الي بتؤرقنا
لانها بتأثر على صحة الأطفال
كمان قلة اكل الطفل بتحسسنا بالتقصير الشديد تجاهه
غير بقى التعليقات من أي حد على وزن الطفل بتضايقنا جدا
الاول لازم نفهم ايه هي اسباب المشكلة
الاسباب بتنقسم لنوعين ، اسباب عضوية او مرضية و أسباب نفسية
الأسباب العضوية
اهمها التسنين و في الفترة دي الطفل بيبدأ يطلع الضروس و الانياب فبديهي أن يفقد شهيته للاكل
انا فاكرة اما جيت اطلع ضرس العقل و كنت في الكلية فضلت اسبوع مش قادرة اكل
فما بالك بطفل بيطلع اكتر من ضرس و متالم و انت تجبريه ياكل
ممكن الطفل يكون مريض او داخل على مرض و احنا منعرفش و ده برضو بيسد نفسه عن الاكل
الاسباب النفسية
الطفل بيكون حس باستقلاليته في الفترة دي و بيرفض اي حاجة يحس انه مجبر عليها
الطفل مشغول باللعب و الحركة و مش عاوز يقعد علشان ياكل
الطفل مش عاوز حد ياكله و عاوز ياكل لوحده
الطفل زهقان من الاصناف الي بتتقدمله
ازاي هنتعامل مع المشكلة دي ؟
:) اولا في حاجات لازم نفهمها
●الطفل احتياجاته من الاكل بعد السنة الاولى مش زي ماحنا متخيلين و معدته مش كبيرة العبرة بالانواع و ليس بالكميات
●الطفل لو جعان هياكل او هيرضع على حسب حالته في حالة المرض او التسنين الطفل بيفضل الرضاعة لانها أسهل و بتساعد في تسكين الالم
:( :( ثانيا في حاجات ممنوع ممنوع نعملها
●متفطميش الطفل و تقولي علشان يرضى ياكل...هتلاقيه بقى و لا اكل و لا رضاعة..
هو لو كان قادر ياكل كان كل
●متكتفيش الطفل و تحشري الاكل في بقه بالعافية...
شفت امهات بتعمل كده..ده تصرف غير ادمي و بتكرهي الطفل في عمليه الاكل من اولها لاخرها
●متتحايليش على الطفل انه ياكل و تحسسيه انه بيتفضل عليكي اما يرضى ياكل
لانه مع الوقت هيستغل ده في مضايقتك و الضغط عليكي
● طالما وزن الطفل حوالين الرينج الطبيعي متقلقيش..و خلي بالك الرينج الطبيعي في السن ده بيكون واسع و في تفاوت كبير
●متقارنيش اكل طفلك باكل اي طفل تاني
♥♥ثالثا حاجات نعملها
●الجأي لربنا بالدعاء انه الطفل نفسه تتفتح و يتقبل الاكل
●خلي دايما في خيارات و تنوع خضار فواكه بروتينات نشويات و اعرضي على الطفل اكتر من حاجة و اكتر من بديل
●طعام الاصابع -الطعام المقطع و الطفل بياكله بنفسه - من الحاجات المفضلة للطفل حاولي تقدمي انواع مختلفة بالطريقة دي
●ثبتي 3 وجبات رئيسية واحدة اول ما الطفل يصحى و واحدة في معاد الغداء بتاع الاسرة و وجبة قبل ما ينام حتى لو ماكلش غير معلقة واحدة علشان معدته تتعود على نظام ثابت
و مابينهم اعرضي عليه خضار او فاكهة او عصير او اي سناكس
●اعملي ترابيزة و كرسي لاكل الطفل نبدأ عليهم الاكل بس لو الطفل بيحب الحركة و حب يقوم مفيش مشكلة و كمليله اكل و هو بيلعب هياكل احسن
●خلى الطفل ياكل بنفسه و يتعود على استخدام الشوكة و الملعقة و ده هيشجعه اكتر على الأكل
●كلي معاه من اكله علشان تشجعيه و اظهري استمتاعك بطعم الاكل و خلي وقت الاكل وقت سعيد
●ممكن تديله مياه لو رفض في تص الاكل هيكمل اكل بعدها
● لو الطفل يقدر خليه يساهم في تحضير الاكل بتاعه
●شجعيه اما ياكل كويس بابتسامة و قوليه ماما مبسوطة علشان انت بقيت تاكل كويس
● حتى لو صغير اتكلمي معاه عن اهمية الاكل و فوايده ليه بطريقة مرحة و مشجعة
● طالما وزن الطفل حوالين الرينج الطبيعي متقلقيش..و خلي بالك الرينج الطبيعي في ابسن ده بيكون واسع و في تفاوت كبير
#النشكلة_فينا_مش_فيهم
زوجة وأم وصيدلانية مهتمه بالتربيةوالتعليم بنظام منتسوري .. ، ، ،
