السلام عليكم و رحمة الله و بركاته
هتكلم النهاردة عن اول شهر فى حياة البيبي ايه اهم السمات الى بتميز المرحلة دى و ايه المطلوب منى كأم علشان اساعد طفلي انه يطور من نفسه و يتأقلم مع الحياة الجديدة
و هى دى مهمتك فى الايام الاولى من حياة طفلك..
اول شهر بيكون مرهق شوية بالنسبة للطفل و الام
الطفل بيكون لسة مستغرب الحياة و مش قادر يتاقلم مع الحياة خارج رحم الام
و الام بتكون مجهدة من الولادة و الرضاعة و بكاء البيبي و قلة النوم فى الفترة الاولى خصوصا لو ام اول مرة فبيكون كل شيء بالنسبة ليها جديد
المطلوب منك الفترة دى الصبر و تحاولي ترتاحى قدر المستطاع كل ما تجيلك فرصة
رضعى البيبي و احضنيه و حسسيه بضربات قلبك لان دى من اكتر الحاجات الى بتطمن البيبي و بتحسسه بالامان
اهتمامات الطفل بتكون قليلة الشهر ده لكن اكتر حاجة بتشد انتباهه هى تامل الوجوه
افكار مقترحة:
علقي لعبة فوق سريره
غني له لان الغناء بيهديهم
هزيه برفق
احضنيه
كلميه كتير
شغلي قران او اقراي له قران
ممكن تلجاى لاصوات الضوضاء البيضاء لتهدئته لما يبكي او مساعدته على النوم و هى بتكون اصوات زي صوت المكنسة او القطار او خرير المياه و فى تطبيقات على جوجل اسمها white noise
اهتمى بالرضاعة الطبيعية و ملامسة الطفل لك اوقات كثبرة
قربي وشك منه و انتى بتكلميه و سيبيه يتامل ملامحك
حاولي متخليهوش يبكي كتير و سارعي لتلبيه احتياجاته حتى لا يشعر بانعدام الامان
و اخر الشهر الاول هتاخدى اول هدية من البيبي بتاعك هتنسيكي تعب الشهر كله
و هى اول ابتسامة حقيقية من طفلك
زوجة وأم وصيدلانية مهتمه بالتربيةوالتعليم بنظام منتسوري .. ، ، ،
