المشكلة التانية الي بتواجهنا بعد اول سنة من عمر الطفل و يمكن قبل كده بشوية هي الكركبة و قلة النظام
الطفل بيقلب لعبة كلها على الأرض..اللعب مرمية في كل حتة في الشقة
الطفل بيفتح اي درج او دولاب و يقلب كل الي فيه
و نفضل طول اليوم نشتكي من البهدلة الي في البيت
الاول لازم نفهم الطفل بيعمل كده ليه؟
حب الاستكشاف و الفضول من اهم الاشياء الي بتميز الطفل في السن ده
فده طبيعي جدا في سنه و مش حاجة نلومه او نزعقله عليها
طيب انا نفسي ابني او بنتي يكونوا منظمين اعمل ايه ؟
الموضوع محتاج شوية خطوات..
الخطوة الاولى
اشبعي رغبته في الاستكشاف
من اول ما جتى بدات تتحرك و تفتح في الدواليب خليت كل الدرف الي في متناول ايديها فيها حاجات امنه و سيبتها تعيش حياتها
كان المطبخ كل شوية يطلع كله في الارض ..
و طبعا كان لازم اول ما تخلص المه قصادها و اعرفها ان كل حاجة ليها مكان
مرة على مرة و مع مرور الوقت زهقت من الحاجات و اشبعت رغبتها غي استكشافها و الموضوع قل بنسبة كبيرة جدا
هي سنة و 3 شهور
و بقى استكشافها منظم شوية يعني تفتح و تطلع حاجة معينة هي عاوزاها من غير ما تكركب الدنيا
انت لو سبتي الطفل يستكشف براحته من غير ما تحسسيه ان الى بيعمله ممنوع هو شوية و هيزهق و مش هيتمسك بالموضوع و مش هيعند معاكي
حتى دولاب الهدوم ..الادراج ..الثلاجة..بابعد بس الحاجة الي تبهدل الدنيا علشان متوصلهاش بسهولة و اتدارك الموقف
انما غير كده ليها كامل الحرية في الاستكشاف
..........................................................
الخطوة التانية
رتبي الالعاب بحيث يوصل لها بسهولة
زي ارفف المنتسوري كل رف عليه لعبة واحدة بس علشان ياخدها مش لازم يقلب الدنيا ..مع الوقت الطفل هيعرف مكانها و هياخد اللعبة الى هو محتاجها بس و يرجعها اما يخلص
بلاش نحط اللعب في صندوق لان الطغل هيضطر يقلب كل الي فيه علشان يطلع اللعبة الى هو عاوزها
الحمد لله انا ليا تجربة جميلة مع الارفف
عملتها لجنى من الكارتون و هي 6 شهور و واظبت اني ارجع اللعبة مكانها في وقتها و اقولها بعد ما نخلص لعب نرجع اللعبة مكانها
في البداية كانت بتقلب كل اللعب مرة واحدة
بعد كده على السنة تقريبا كانت بتاخد اللعبة الي عاوزة تلعب بيها بس و انا كتت باشجعها و اساعدها نرجعها قبل ما تاخد واحدة تانية
الحمد لله دلوقتي بقت احيانا كتيرة تخلص النشاط و تاخده تحطه مكانه
و انا اما شفت الموقف ده كنت في قمة الانبهار و حسيت اخيرا ان التعب و الصبر جاب نتيجة
..............................................................................................
الخطوة التالتة
عدد لعب محدود
الخيارات الكتيرة بتشتت الطفل و مع الوقت كمان هيزهق من لعبه
اختاري عدد من اللعب و الانشطة حطيهم على الرف و غيري كل اسبوع
................................................................................................
الخطوة الرابعة
كوني ام منظمة
خلي لكل حاجة في البيت مكان ثابت و بعد ما تستخدم ترجع مكانها على طول
متسيبيش الطفل يكركب و يقلب طول النهار و تقولي الم مرة واحدة اخر اليوم ما هو كده كده هيقلبهم تاني
كده الطفل هيتعود على منظر الفوضى
خليكي مثابرة و رجعي كل حاجة مكانها في وقتها
تخلصي شرب ترجعي الكوباية مكانها في المطبخ
و يستحسن لو تتغسل في ساعتها و الطفل يكون شايفك
جنى بتصر بعد ما اخلص شرب انها تمسك الكوباية بنفسها و تحطها في الحوض
باباها يسيب محفظته على الترابيزة لازم تديهاله
كان في صورة معلقاهالها على الحيطة و اللزق فك و وقعت فضلت تعيط و تزق فيا و انا مش فاهمة هي عاوزة ايه
مسكتتش غير لما علقتهالها تاني و فهمت انها بتعيط علشان عاوزاها تتحط مكانها
بدات تتعود ان كل حاجة لازم تكون في مكانها
الموضوع متعب في البداية لكن نتايجه جميلة و هتريحك في المستقبل
..............................................................................................
الخطوة الخامسة
وضحي لطفلك اهمية النظام
الطفل مهما كان صغير بيدرك و يستوعب كلامك
كلميه كتير و قولياه لازم نحط اللعبة مكانها بعد ما نخلص علشان متتبهدلش
لازم نحط كل حاجة مكانها علشان شكل البيت يكون منظم و جميل
و اظهري سعادتك و انت بتقولي الكلام ده و و انت بترجعي الحاجة مكانها علشان يرتبط في ذهنه ان النظام جميل و حاجة بتفرحنا
#المشكلة_فينا_مش_فيهم
