التربية تبدا من قبل الحمل

السلام عليكم و رحمة الله وبركاته
كلنا لما بنكون مقبلين على اى خطوة فى حياتنا بنستعد من قبلها بفترة

و نسال اى حد ليه خبرة فى الموضوع ده علشان يساعدنا

ممكن بردو نقرا كتب

و لو رايحين شغل جديد بيكون فى فترة تدريب فى البداية

اما بنشتري جهاز جديد فى البيت لازم نقرا الكتالوج بتاعه علشان ميبوظش واحنا بنستخدمه

طيب هل كل الحاجات دى اهم من تربية ولادنا؟؟

الامانة الى ربنا ادهالنا و هنتحاسب عليها

اكيد اى واحدة بتمر بتجربة الامومة لاول مرة بيكون خبرتها قليلة مع الاطفال

و محتاجة تستعد كويس اوى للمرحلة دى

خصوصا ان التربية دى مش اكل و شرب و عناية شخصية و بس

لا ..دى تنشئة انسان كامل عايزة تزرعى فيه الدين و الاخلاق و تنمى مهاراته و قدراته

و تطلعيه شخصية سوية

هتكلم هنا عن الاستعدادات الى لازم كل واحدة مقبلة على الامومة انها تحاول تعملها من قبل الحمل اواثناء فترة الحمل

اولا:خلى عندك نية انك تنشئي ذرية صالحة تصلح فى الارض و تكون سبب فى دخولك الجنة
و النية دى هتسهل عليكى كتير اوى انك تصبري و تتحملي متاعب دورك الجديد

ثانيا:الاهتمام بالصحة العامة للأم قبل الحمل و اثناء فترة الحمل و اثناء فترة الرضاعة الطبيعية عن طريق الاهتمام بالتغذية الصحيحة و الابتعاد عن العادات الصحية الخاطئة
و بردوعدم تناول اى دواء بدون استشارة الطبيب
لان الطفل فترة الحمل و الرضاعة صحته بتعتمد بشكل كبير على الام فلازم منهملش الجانب ده

ثالثا:الاستعداد النفسي لتقبل دورك الجديد الى هتقومى بيه و ادراك  حجم مسئولية الامومة و جعل الطفل من اول الاولويات الى فى حياتك

رابعا:الاستعداد المعرفى و اقصد بيه انك تحاولى تغرفى كل حاجة تخص تربية الاطفال فى كل النواحى من مصادرها الصحيحة

فى كتب كتير اوى موجودة اونلاين بتتكلم عن الاطفال و كل حاجة تخصهم
و مواقع و مدونات و صفحات على الفيس
مينفعش تكونى ام متاخرة فى وقت زى الى احنا فيه ده لان كل المعلومات بقى سهل جدا للحصول عليها
و الحاجات المهمة الى لازم نقرا فيها
تطور الطفل- تغذية الطفل- الاساسيات الطبية فى حالات مرض الطفل - انشطة تساعد على التطور و تنمية المهارات -الاحتياجات النفسية للطفل
و الى حابة تزود يا ريت تقرا فى مناهج التربيةالمختلفة زى منتسوري و فى منهج نماء و منهج بورتاج و حاجات تانية كتير
و نصيحة ابداى من بدري تقرأى وتعرفي كل الحاجات دى هتفيدك شخصيا و هتفرق اوى فى طريقة تعاملك مع اولادك

خامسا:لا تهملى التربية الايمانية و الدينية لانها اهم شئ و هدفك الاساسي
ابداى تسمعى البيبي قران اثناء الحمل و اثناء الطفولة المبكرة
و خذى نية انه يكون من حفظة كتاب الله
اهتمى بتعليمه تعاليم الدين الاسلامى و ابحثى لتعرفى العمر المناسب لتعطيه كل معلومة و ابحثى عن طرق جديدة للتعليم

اخيرا:وفري بيئة صحية مناسبة لاستقبال الطفل و جو اسري هادئ و اشركي زوجك معك فى كل هذه الاستعدادات
فالطفل يصبح سويا عندما يرى والديه متفاهمين

ام لاول مرة..شعور بالصدمة لابد منه !!

كان نفسي اوى بنتى توصل الدنيا بالسلامة..و كنت باحلم بالوقت الى هشيلها فيه و العب معاها

بس بما ان دى اول تجربة ليا كام..مكنتش متوقعة الى بيحصل اول فترة بعد ولادة البيبي..

يمكن لو كنت فكرت بشكل واقعى اكتر كان احساسي بالصدمة قل شوية..

ايه البيبي ده كل شوية بيعيط..و كل خمس دقايق عايز يرضع..و كل خمس دقايق عايز يغير..

طيب انا تعبانة و لسة خارجة من عملية و عايزة ارتاح..

نفسي انام ساعة واحدة متواصل من غير ما اصحى من النوم ..

فين بقى البيبي الى نايم فى السرير وانا اروح الاعبه ؟؟

هوليه محدش حاسس بيا و كل ما حد يشوفنى يقولى بنتك جعاانة رضعيها..طيب مانا لسة مرضعاها ونفسي ارتاح شوية بقى..

هو ده ملخص اول شهر بعد الولادة..عدم نوم..رضاعة..تغيير البامبرز..

حسيت انى اتصدمت و انى مش اد المسئولية..

بس فكرت و قلت لنفسي انا مش اول ام فى الدنيا..و بنتى مش اصعب بنت..

ما الناس كلها ربت اطفال..

حسيت ان الاحساس الاول ده و الصدمة دى كانت ضرورية علشان استعد للى جاى..

علشان اعرف انى خلاص مبقتش ملك نفسي و انى بقيت ام..

علشان لسة ياما هشوف..فكان لازم اتهيا نفسيا ان الامومة مش لعبة و مش حاجة سهلة..

و علشان ابدا انظم حياتى من جديد و اعمل حساب ان فيه طرف مهم جدا بقى من اول اولوياتى..

الحمد لله الفترة الاولى دى علمتنى الصبر..و طول البال..علمتنى تحمل المسئولية..شجعتنى على تنظيم وقتى و اولوياتى..

وعلمتنى اكون ماما.. :)

بقيت ماما..احساس ميتوصفش

اما يبقى عندك ولاد هتعرفى اهلك بيحبوكى اد ايه

جملة كانت بتتقالى كتير ومكنتش بافهمها..مفهمتهاش وحسيت بيها غير لما ربنا رزقنا بجنى.... اول فرحتنا

احساس ميتوصفش اما تشوف حتة منك قصادك..

كنت مستنياها اوى قبل ما احمل فيها..و طول شهور الحمل باستعجل الزمن يجري علشان اشوفها بعينى

كنت باستنى ميعاد الدكتورة من الشهر للشهر علشان اشوفها فى السونار لحظات قليلة

كنت حاسة انى باحبها اوى من قبل ما اشوفها

بس لحظة ما شفتها بعيني ولمستها ساعتها بس حسيت ايه هوحب الام لاولادها

احساس ربنا بيحطه جوا القلب..مالوش وصف ولا ليه سبب..

سبحان الله بالرغم من ان الاطفال مسئولية صعبة بس بنموت فيهم و منتخيلش حياتنا من غيرهم

طول الوقت نفسى انيمها..و لوطولت فى النوم بابقى هاتجنن عايزاها تصحى علشان اشوفها بتلعب قصادى..

ضحكتها ليا بتهون كل التعب الى باشوفه معاها..

زى ما ربنا سبحانه و تعالى قال المال و البنون زينة الحياة الدنيا

فعلا ولادنا هما الى بيزينوا حياتنا و بيدوها طعم واحساس عمرنا ما كنا هنحسه من غيرهم

بيخلوا لحياتنا معنى و هدف..

كائن صغيرضعيف بقيت مسئولة عنه فى كل حاجة..جاى الدنيا حاسس انه غريب و ميعرفش حد غيرى..

انا مصدر الامان الوحيد بالنسبة ليه..ومينفعش اخذله لان انا كل الدنيا بالنسبة ليه..

ربنا يحفظك ليا يا جنى..و يقدرنى انى اكون اد المسئولية و اكون ام كويسة ليكى..