ارفف منتسوري من الكارتون...صناعة منزلية

السلام عليكم و رحمة الله و بركاته

من أكثر التعليقات التى اسمعها على تطبيق منهج منتسوري هو التكلفة العالية

و لكن هذا غير صحيح 

فكثير من الأشياء يمكن صناعتها منزليا بابسط تكلفة او بدون تكلفة على الاطلاق

أعجبتنى فكرة وضع الالعاب و الانشطة على ارفف في طريقة منتسوري

و شجعتني هذه التدوينة من أم مبدعة على تنفيذ ارفف من الكارتون

http://nbh-basma.blogspot.com/2014/07/blog-post_14.html#.VeS4axr8Jct

جزاها الله كل خير

و قد ساعدني زوجي في تنفيذها
احضرنا ستة كراتين و للأسف لم يتوفر ستة كراتين متماثلة في الحجم فحاولنا تعديلهم قدر الامكان
قمنا بلزق كل كرتونة مع التى بجوارها و التى اسفلها باللاصق ثنائي الاوجه
ثم قمنا بلصق كل الكراتين معا جيدا بالسلوتيب العريض
و لصقنا جميع الفواصل جبدا بالسلوتيب العريض حتى اصبحت الكراتين الست كانها وحدة واحدة
زوجي هو من قام بالخطوات السابقة
و اصبح شكلها هكذا

قمت انا بعد  ذلك بتغليفها بالاستيكر على شكل خشب
تجدونه يباع في محلات الدهانات أو المكتبات
فأصبحت بهذا الشكل

و هذا بعد اضافة بعض اللعب لها لتجربتها

و هنا في مكانها في غرفة جنى بعد وضع الالعاب و الانشطة عليها

و السلام عليكم و رحمة الله و بركاته

خطوة خطوة منتسوري..الحلقة الرابعة..اعداد المنزل...المنتسوري اسلوب حياة..جزء 1

السلام عليكم و رحمة الله و بركاته

سوف ابدأ معكم اليوم بأولى الاعدادات التى نفذتها لتطبيق منهح المنتسوري مع ابنتى..و هى اعداد المنزل ليلائم مبادئ منهج منتسوري

يركز المنتسوري على دعم استقلالية الطفل و اعتماده على نفسه و توفير بيئة غنية و ملائمة لتطوره في امان

لذلك سوف نحتاج لعدة شروط يجب توافرها في البيئة المحيطة بالطفل:

1-بيئة آمنة

2-تدعم استقلالية الطفل

3-غنية بالمؤثرات الحسية المختلفة

4-تتسم بالنظام

اولا:مكان نوم الطفل

يجب ان يكون مكان نوم الطفل آمنا و في المنتسوري سرير الطفل عبارة عن فراش ارضي لسببين:

الأول هو توفير الأمان للطفل حتى لا يسقط من على السرير

و الثاني دعم استقلالية الطفل..فعندما يبدأ الطفل بالحركة سيستطيع مغادرة فراشه عند الاستيقاظ أو الذهاب اليه عند الشعور بالنعاس من تلقاء نفسه دون مساعدة من أحد

و لكن بالنسبة لي لم استطع تحقيق هذه الجزئية مع جنى لأنها لا تقبل ان تنام الا بجواري مهما حاولت...و وجدت في النهاية ان هذا اكثر راحة لى و لها

في الشهور القليلة الأولى عندما يكون الطفل نائما على ظهره يفضل وضع العاب معلقة فوق فراشه لتثير حاسة البصر عنده

و وجد انه في الفترة الأولى اكثر الوان تجذب انتباه الطفل هما الابيض و الاسود

يمكن وضع معلقات مثل التى في الصورة فوق فراش الطفل و يمكن صناعتها منزليا بسهولة

و بعد فترة يمكن ادخال الالعاب الملونة لأن الطفل سوف يبدأ في تمييز الألوان بشكل أفضل
و لقد طبقت هذا الجزء مع جنى و علقت لها هذه اللعبة منذ ولادتها

في الشهر الأول لم تستجب لها..ثم بعد ذلك بدأت تثير انتباهها..و شجعتها اللعبة ان تحرك قدميها لتهزها لتصدر صوتا..ثم بدأت تحركها بيديها فكانت بهذا نشاط حسي و حركي في نفس الوقت.. (سوف اتحدث عن انواع الأنشطة لاحقا )

يتم ايضا وضع نرآة آمنة بجانب فراش الطفل حتى يرى فيها نفسه و يتعرف عليها و سوف يستمتع كثيرا بمشاهدة نفسه في المرآة

لم استطع توفير مرآة آمنة
فكنت آخذ جنى يوميا الى المرآة كي تشاهد نفسها و قد اعجبهاةهذا الأمر كثيرا و كانت تنظر الى صورتها في المرآة و تتحدث اليها

ثانيا : مكان اللعب
عندما يكبر الطفل قليلا و يبدأ في الحركة و الزحف يجب أن يكون مكان لعبه مناسبا لقدراته..كيف هذا؟
اي انه يجب أن تكون العابه في متناول يديه ..في نظام منتسوري فأن الالعاب و الانشطة توضع على ارفف كل لعبة على حدة و لا توضع مكدسة في الصناديق او في دواليب او اماكن مرتفعة لا يستطيع الطفل الوصول اليها

و المميزات التى توفرها تلك الأرفف هى:

1-سهولة الوصول اليها بواسطة الطفل

2-توضح للطفل الخيارات المتاحة امامه فيختار بنفسه اللعبة او النشاط الذي يريد اللعب به مما يعزز ثقته بنفسه

3-تعلم الطفل النظام فهو يعلم ان لكل لعبة مكان محدد و بعد الانتهاء من اللعب تعيد الأم اللعبة الى مكانها على الرف

و بعد ان يكبر الطفل سوف يقوم هو باعادة الالعاب الى مكانها تلقائيا

و قد قمت انا و زوجي بتصميم وحدة ارفف منزليا باستخدام الكرتون و سوف اذكر طريقتها في تدويتة لاحقة

و ها هى جنى و هى تختار الالعاب بنفسها من على الرف

و بمكن ايضا تعليق صور طبيعية بسيطة فى مستوى نظر الطفل حتى يستطبع تأملها

عندما يكبر الطفل قليلا يتم استخدام سجادة صغيرة يفرشها الطفل أولا قبل ان يأخذ النشاط حتى يحدد بها منطقة لعبه وبعد ان ينتهى يطويها و يعيدها مكانها

و عندما يكبر اكثر نضع له كرسي و منضدة بحجم صغير يناسبه حتى يجلس عليهما اثناء ممارسة الأنشطة

انتظروا الجزء الثانى من اعداد المنزل

و السلام عليكم و رحمة الله و بركاته

خطوة خطوة منتسوري...الحلقة الثالثة..كيف ابدأ؟

السلام عليكم ورحمة الله وبركاته 

اول  ما بدأت اقرأ عن المنتسوري  كنت تايهة و متلخبطة..المصادر  كتير..كتب و مدونات  و أمهات بتطبق الأنشطة مع أولادها. .و بالرغم ان بنتي ساعتها عمرها مكنش عدى الأربع شهور..الا انى فعلا مكنتش  عارفة  ابدأ ازاى؟

اقرأ كل الكتب دي و بعدين اطبق معاهاولا اعمل ايه؟ الأمهات الى بيعملوا انشطة لأولادهم بيلاقوا وقت و جهد ازاى؟

يا ترى هعرف اعمل كده ولالا؟

طيب هو الموضوع مكلف؟ انا شايفة لعب و أدوات و قصة كبيرة؟هل الحاجات دى هتحتاج مبلغ كبير؟

ده كلام بيدور في دماغ كتير مننا اول ما بنتعرف على فكرة التعليم المنزلى و الانشطة و بيخلينا تايهين و مش عارفين نبتدي ازاى

الأول انا هاتكلم عن تجربتي الشخصية

انا بدأت اعرف عن التعليم  المبكر  و المنتسوري  بعد ما ولدت جنى بنتى بفترة قصيرة..فضلت فترة اجمع في كتب و مصادر و ادخل على مدونات و صفحات  و مش ملاحقة طبعا اقرا كل ده و لا باطبق بشكل كافي

لحد ما قررت اني اخد خطوة جدية و ابدأ احدد المنهج الى عايزة امشي بيه معاها و عملت الاتي:

اولا قررت امسك كتاب واحد بس اقراه و اما يخلص اشوف كتاب غيره و هكذا علشان التشتت

ثانيا اشتركت الحمد لله في كورس منتسوري من البداية تبع اكاديمية عقول مع د. دعاء مجدي جزاهم الله جميعا كل خير و لسة مستمرة في الكورس الى الان بس هو فعلا فرق معايا جدا في تنظيم افكاري

ثالثا بقيت لما ابحث عن انشطة اكتب في البحث عمر جنى مش ابحث بشكل عام يعنى مثلا انشطة من 3-6 شهور و هكذت علشان متوهش

رابعا طبقت كل ال  اتعلمته بشكل عملي في حاجات بسيطة اشتريتها  و معظم الانشطة نفذتها في البيت و عملت بعض التعديلات في البيت علشان يلاءم مبادئ منتسوري و فعلا اكتشفت ان الموضوع بسيط جدا و مش مرهق و لا مكلف للدرجة الى بنتخيلها اما نبص للموضوع من برة

خامسا بدأت اكتب في المدونة دى علشان اشجع نفسي و اشجع امهات تانيين انهم يبدأو مع اولادهم

شوية نصايح بسيطة للأمهات الى لسة مبدأتش:

- لو انت لسة مقبلة على الأمومة انتهزي الفرصة و اقرأي كتب و خبرات و اكتبي كل حاجة تحسيها مهمة لان في الغالب الفترة الاولى بعد الولادة مش هتعرفي تعملي فيها حاجة

- لو انت عندك اطفال فعلا ابدأي معاهم على طول و متنتظريش انك تقرأي كل حاجة قبل ما تطبقي..اعملي الخطوتين موازيتين لبعض

-الموضوع مش مكلف و ممكن بتوفير جزء بسيط من مصروف البيت نجيب الحاجات الى محتاجينها للطفل و مش هنقدر ننفذها و مش مرهق بل بالعكس ده ممتع جدا للأسرة كلها

 و كل حاجة بالتدريج بتتم و بتكون سهلة

استعينوا بالله و استحضروا نية انكم بتنشئوا ذرية صالحة و ربنا يعيننا على تربية اولادنا

و السلام عليكم و رحمة الله و بركاته

خطوة خطوة منتسوري..الحلقة الثانية..لماذا منتسوري؟

 السلام عليكم  ورحمة الله و بركاته

اتكلمت المقال الى فات عن منهج منتسوري و نبذة مختصرة عنه

طيب انا كأم و كتير من امهات جه في دماغهم السؤال ده

ليه انا اتعب نفسي مع الطفل ما هو كده كده هيتعلم الحاجات دى في يوم من الأيام

و ناس تانية هتقول هو الطفل ده فاهم حاجة..لسة بدري على الى بتعمليه مع بنتك ده

و دى انا فعلا سمعتها من الى حواليا

لازم قبل ما ابدأ التعليم المبكر مع اولادى افهم انا ليه باعمل كده علشان مفقدش الحماس الى هابدأ بيه و افضل مستمرة معاهم

التعليم المبكر هو التعليم فى السنوات الأولى من عمر الطفل

ايه بقى فايدة التعليم المبكر ده

انا من وجهة نظري و بعد بحث لقبت ليه فوايد كتير 

خاصة لو الأم هى الى هتقوم بدور المعلم للطفل

فأنا هنا باتكلم عن تعليم منزلى مبكر

أولا من وجهة نظر علمية:

الطفل بعد ولادته بتكون الوصلات العصبية الى في المخ متكونتش كلها

فأي مؤثر بيتعرض له فى أول سنتين من عمره بيساهم في زيادة عدد الوصلات العصبية

يعني مثلا الطفل أما بيمسك حاجة في ايده علشان يستكشفها بتيجي الأول اشارة من المخ للأيد انها تمسك الحاجة دى بعد كده الأيد اما تلمس بتبعت اشارة للمخ بالتأثير الناتج عن الحاجة دى مثلا ناعمة او خشنة و هكذا 

بعدين بتيجي اشارة تانية من المخ للايد انها توصل الشئ ده للفم 

و هكذا

كل الاشارات دى بتساهم في تكوين وصلات عصبية جديدة في المخ

و طبعا كل ما الوصلات دى زادت كل ما كفاءة المخ زادت

يعني تأثير الموضوع ده ممتد طول حياة الطفل ان شاء الله

فلو الطفل اتوجد في بيئة خالية من المؤثرات الحسية المختلفة

مش هايلاقي الخبرات الكافية اللازمة لتكوين الوصلات دى

ثانيا من وجهة نظر منهج منتسوري:

اتكلمت المقال الى فات بردو عن الفترات الحساسة في حياة الأطفال و اهميتها في تعليمهم و اكتسابهم مهارات معينة

فانا لو مش مركزة مع الطفل من اول ما يتولد هتمر الفترات الحساسة دى من غير ما اخد بالى منها و بالتالى الطفل هيخرج منها بدون ما يكتسب المهارة الى كان المفروض يكتسبها لان انا موفرتلوش المؤثرات الى كان محتاجلها

و مثال على كده و ده بنشوفه كتير 

الفترة الحساسة للطفل انه يتعلم يأكل نفسه من 7 شهور لسنة و نصف

طيب لو انا مديتلوش الفرصة انه يكتسب المهارة دى في وقتها و فضلت انا الى ااكله بنفسي طول الوقت اما يكبر هياخد وقت اكبر بكتير علشان يتقن المهارة دى و كتير بنشوف أطفال كبير مبتعرفش تأكل لوحدها و مبتعرفش تشرب لوحدها

ثالثا من وجهة نظري الشخصبة :

 اكيد كل ام بتتمنى ان ولادها يكونوا مميزين و مختلفين

شايفة اننا اما نبدأ معاهم كل حاجة من بدري هيفرق معاهم عل  المستوى العقلي و كمان على المستوى العاطفي لأنك بتلاقي أرض مشتركة تجمع بينك و بين طفلك

هتنزلى لعقله و هتقربي منه و هتقضي معاه وقت اكبر

و أكيد ده أثره هيستمر طول العمر

مش هنسيب ولادنا للتليفزيون يدمر عقلهم و شخصيتهم

مش هنسيبهم للزهق و الملل في طفولتهم

و أحلى حاجة في الدنيا أما تكوني معلمة طفلك الأولى

طيب الاسباب دي بشكل عام عن التعليم المبكر
اما عن التعليم بنظام منتسوري فأنا على المستوى الشخصي عجبني جدااا
و تمنيت ان ارجع طفلة علشان اتعلم عن طريقه
و هو فعلا له مميزات كتير
اهمها انه بيلبي احتياجات الطفل في التعلم و مرن جدا 
كمان بيتميز بالنظام و ده بيعود الطفل انه يكون منظم طول حياته
بيعلم الطفل الاستقلالية و الاعتماد على النفس
فأنا وجدت انه مناسب اني ابدأ بيه مع بنتي

السلام عليكم و الى اللقاء في الحلقة القادمة

خطوة خطوة منتسوري..الحلقة الأولى..ما هو المنتسوري؟

السلام عليكم و رحمة الله و بركاته

ما هو المنتسوري؟

هو منهج لتعليم الاطفال و التعامل معهم ابتكرته ماريا منتسوري

هى طبيبة ايطالية تخصصت بعد ذلك في مجال تربية الاطفال و تعليمهم و ابتكرت منهجا سمي على اسمها يهتم بتربية الاطفال و تعليمهم من الولادة و خلال جميع مراحل طفولتهم

بنت ماريا منتسوري نظرياتها من خلال ملاحظتها القريبة للأطفال و على اساس ذلك استنتجت بعض الاستنتاجات التى تتعلق بالتعامل مع الاطفال منها:

-ان الطفل ليتعلم لا يجب ان يخاف ..فيجب علينا توفير روح المرح اثناء التعلم

'ان الطفل منذ الولادة و حتى ست سنوات من عمره يعمل عقله ليخزن اى معلومة او خبرة او مهارة بوعي او بدون وعي منه و سمت عقل الطفل في هذه المرحلة بالعقل الممتص فيجب استغلال هذه الخاصية في عقل الطفل لتعليمه مهارات متعددة و صفات وعادات جيدة

-ان الطفل منذ ان يولد يسعي لأن يستقل بذاته و يعتمد على نفسه فيبدأ اولا بمحاولاته للحركة حتى يصل الى المشي..محاولاته للوصول الى الأشياء..محاولاته ليفعل مثل ما يفعل الكبار..فيجب علينا كمربين ان نهيء له عالما يستطيع فيه الاعتماد على نفسه دون ان يكون هناك خطر عليه

-الشعور بالتقدير من الاشياء التى يحتاجها الطفل فلا يجب ان نقلل من مشاعره و احاسيسه و احتياجاته

-هناك فترات او مراحل حساسة يمر بها الطفل على مدار فترة طفولته المبكرة و تعريف هذه المرحلة هى فترة يسعي الطفل فيها الى تعلم شيء ما او مهارة جديدة و يجب على المربي ان يسعى لاكتشاف هذه الفترات ليوفر للطفل بيئة ثرية بالانشطة و المثيرات المختلفة التى تساعده على اتقان هذه المهارة

و من سمات هذه المراحل ان الطفل يسعى فيها لتكرار فعل معين مرات كثيرة دون ملل 

-الطفل يعشق النظام في كل شيء في حياته..من واجبنا ان نحافظ له على النظام الذي يريده فى كل شيء

هذا مختصر للتعريف بماريا منتسوري الأسس التى بنت عليها منهجها

و ساذكر التفاصيل في كل مرحلة من مراحل نمو الطفل

عالم جديد اراه لاول مرة...منتسوري و أشياء اخرى

السلام عليكم و رحمة الله و بركاته

بعد ان رزقنى الله بجنى كنت اتصفح ذات يوم صفحة للأمهات لتبادل الخبرات فوقعت عيني على كلمة منتسوري

لم أفهم ما معنى هذه الكلمة التى يتحدثون عنها

ثم بعد فترة قرأت تلك الكلمة مرة اخرى فى صغحة اخرى فاثارت فضولي تلك المرة و بحثت عن معنى كلمة منتسوري

وجدت انه اسم العالمة ماريا منتسوري التى تخصصت في تعليم الاطفال باسلوب جديد و مختلف

و لكنى لم اتعمق حينها فى الموضوع

كنت حقا اريد ان اربي ابنتي تربية مختلفة

كنت اقرأ كتبا عامة في تربية الأطفال خصوصا التربية الاسلامية و كتبا في مراحل تطور الاطفال و طرق التعامل معهم 

بعد ذلك ظلت هذه الكلمة تطاردنى كثيرا اثناء بحثي و قراءتي في تربية و تعليم الاطفال

حتى قررت ان ابحث و اقرأ عن هذه الطريقة 

و اثناء بحثي فوجئت بكم الأمهات الرائعات اللاتي تعمقن في هذه الطريقة و طرق اخرى و مناهج اخرى في تربية الاطفال و اردن توصيل علمهم لامهات اخريات

وجدت عديد من المدونات العربية اللاتي تتحدث فيها الامهات عن تجربتها في تطبيق المنتسوري مع ابنائهم و التى استفدت منها كثيرا جزاهم الله كل خير

وجدت ابضا مصطلحات اخرى لم اكن اعرفها..ما هو التعليم المرن؟..ما هو التعليم المنزلي؟

سعدت كثيرا اننا طورنا من انفسنا على المستوى الفردي حتى نواكب العالم في تربية ابنائنا 

و لكنى ايضا شعرت بالحيرة الشديدة هل سوف استطيع تعلم كل هذا و نقله لابنتى ؟

الامر حينما تراه من الخارج في البداية تظن انه صعب و معقد

و انك متاخر جدا و لن تستطيع مجاراته

كيف ابدأ و من اين؟

كان ذلك ما يدور في راسي في البداية الى ان من الله على الان و بدات في القراءة و التطبيق و ترتيب افكاري

فقررت عمل هذه المدونة لاكتب تجربتي لعلها تساعد من تريد ان تبدأ مع ابناءها ولا تعرف كيف تبدأ

و سوف ابدأ في كتابة سلسلة منتسوري خطوة خطوة لاكتب فيها خطواتي في تعلم المنتسوري و تطبيقه مع ابنتي

لكل ام جديدة...اهمية تنظيم الوقت

السلام عليكم و رحمة الله و بركاته

طوال حياتي احب تنظيم وقتي و تحديد خطط زمنية لاعمالى اليومية و الاسبوعية و الشهرية و هكذا

احب ان يكون كل عمل انويه مخططا له حتى لا انساه و حتى احسن استغلال وقتي

بعد انجابي لطفلتي جنى احسست بارتباك في نظام حياتي الذي اعتدت عليه

لم يعد بوسعي وضع جدول زمني لاعمالي لانها صارت تأخذ معظم الوقت تقريبا

كنت اشعر معظم الوقت انني منهكة و انني لن استطيع القيام بأي شيء اثناء وجودها معي

و لكني قررت ان اتغلب على هذا الشعور بالخمول و اليأس الذي اصابني في اول شهر فقمت بالاتي

1-أخذت اقرأ عن تجارب الامهات مع ابنائهم حتى اعرف انني لست حالة خاصة و ان الجميع ينجبون اطفالا ليتحملون مسئوليتهم

2-اشتركت فى جروبات للامهات و وجدت ان الشعور بالمشاركة في نفس الموقف يبسط على الانسان كثير من الصعوبات

3-حددت اولوياتى التي يجب ان اقوم بها في اسوأ الظروف واخرى فى ظروف افضل حتى لا اشق على نفسي

4-وقت نوم ابنتي كان يجب ان استغله اما ان انام ايضا لاستعيد نشاطى و اما ان انجز عملا من الاعمال التى حددتها

5-حددت ايضا بعض الاعمال المنزلية البسيطة التى يمكننى انجازها و انا احمل ابنتى او اضعها فى كرسيها الهزاز مع هزها من وقت لاخر

6-لا بجب اهمال الجانب الديني بسبب وجود طفل صغير فيجب الحفاظ على الصلوات في وقتها و العودة تدريجيا الى الحفاظ على ورد من القران و الاذكار
7-خصصت وقتا يوميا للاعتناء بنفسي و لو وقت قصير لان هذا يؤثر كثيرا في الحالة النفسية و المزاجية

8-انجاز الاعمال وفقا لاهميتها مثلا صلاة الفروض.. اعداد الطعام..تنظيف بسيط للمنزل حتى يبقى منظم دائما..عناية شخصية..قراءة او الدخول على النت..و كل هذا يحدث اثناء العناية المستمرة بابنتي

9-يحدث كثيرا فى الفترة الاولى خلل في النظام الذي اضعه بسبب ابنتي فكنت احاول الا اضايق نفسي..فلا بأس بيوم بلا نظام


مع مرور الوقت و نمو الطفل يصبح من السهل التنبؤ بمواعيد نومه و قيلولته و تنظيم الوقت على اساسها و تصبح الحياة اسهل كثيرا  

بعد ان قمت بهذا شعرت بفرق كبيرجدا في نفسيتي و تأقلمت على حياتي الجديدة في وجود زهرة قلبي جنى و اصبحت اكثرا ادراكا لقيمة الوقت و اكثر استفادة منه

الأمومة....دوري الأساسي في الحياة

السلام عليكم و رحمة الله و بركاته

منذ ان عرفت خبر حملي شعرت بجانب شعوري بالفرحة الكبيرة

شعرت ايضا بالمسئولية الكبيرة التى يجب ان اتحملها

فكرت فى طفلتي التي سوف تأتي الى الدنيا ماذا سوف اقدم لها

ماذا افعل حتى اوفر لها التربية التي ترضي الله سبحانه و تعالى

هل رزقني الله بها حتى القي بها  لأهلي او في حضانة للأطفال معظم اليوم و اذهب انا للعمل لأعود اخر اليوم منهكة لا اتحمل حتى ان العب معها او احدثها لبعض الوقت

كثيرون قالوا لي خسارة العمل ان تأخذي منه اجازة انت اولى بالمال الذي سوف يعود عليك منه ضعي ابنتك في الحضانة بعد ان تكمل ثلاثة اشهر او اتركيها لوالدتك كي تعتني بها

و اخرين قالوا هل توجد صيدلانية تبقى في البيت لرعاية اطفالها و تترك عملها...لماذا تعلمتي اذن و اخذتي شهادة عالية؟

سوف تنسين كل ما تعلمتيه بسبب جلوسك في البيت

ما هذا؟؟

هل اترك طفلة رضيعة تحتاج الى حضن امها و رعايتها و حنانها بين يدي غرباء او حتى امي و اذهب سعيا وراء بعض المال؟؟

هل هذا هو الحفاظ على الامانة التي رزقني بها رب العالمين؟

و هل شهادتي فقط فائدتها ان اعمل بها و اجني من ورائها المال؟

ام انني يجب ان استفيد في رعاية ابنائي و اهلي و من حولي

-و انا هنا لا اتحدث عن من تنزل الى العمل لضرورة ملحة الى المال فلها ان توازن بين امورها-

فكرت كثيرا ايهما اكثر نفعا لي و لابنتي و لديني و لمجتمعي

ان احرمها مني في وقت لا تعرف في الدنيا مصدرا للامان سواي

ام ابقي بجانبها لاعطيها ما تحتاجه من حب و حنان و اهتمام و رعاية

و يكون لدي الوقت الكافي لانشئها تنشئة سوية 

دوري في الخارج الالاف يمكنهم القيام به

لكن دوري مع ابنتي لا يستطيع القيام به سواي

فليس لها الا ام واحدة هي انا و لايمكن لغيري ان يملأ الفراغ الذي سوف اتركه ان خرجت للعمل و هي صغيرة و تركتها

فدوري الأساسي في الحياة أن أكون أم اربي ابنائي لينشئوا على طاعة الله و عمارة الارض

و قد اخترت ان اكون أم قبل كل شيء

التربية الدينية و الايمانية فى العام الاول من عمر الطفل

السلام عليكم و رحمة الله و بركاته

اكيد كلنا بنتمنى ان ولادنا ينشئوا في طاعة ربنا و يكونوا على دين 

و يكونوا ذرية صالحة لينا

تكون سبب في رضا ربنا عنا و دخولنا الجنة بإذن الله

طيب هنبتدي نزرع فيهم حب ربنا سبحانه و تعالى و حب الدين من امتى

في ناس بتقول ان اولادها لسة صغيرين و اما يكبروا يبقوا يعرفوا و بتعلموا دينهم

بس من شب على شيء شاب عليه

و التعليم في الصغر كالنقش على الحجر

اى حاجة بنغرسها جوا اولادنا من صغرهم بتثبت جواهم و بتبقى من اساسيات شخصيتهم الى صعب تتغير بظروف الحياة

اكيد انا مبقولش نحرمهم من طفولتهم و نشد عليهم و هم صغيرين

لان هم مش مكلفين 

حتى الرسول صلى الله عليه  و سلم  امر ان احنا نعلم اطفالنا الصلاة لسبع و نضربهم عليها لعشر

لكن فى حاجات بسيطة احنا ممكن نعملها مع اطفالنا في الفترة الاولى من حياتهم تثبت في ذهنهم و تسهل علينا بعد كده مهمة تعليمهم دينهم

في شوية حاجات انا بدات اعملهم مع بنتى من ايام ما كنت حامل فيها و نتوية اكمل فيهم خلال السنة الاولى من حياتها

1-من اول الحمل و انا بادعي ربنا انه بجعلها ذرية صالحة ليا انا ووالدها و يجعلها من المهتدين

2- بدات اشغل قران فى البيت بصوت مسموع و خاصة خلال الفترة الاخيرة من الحمل الى السمع بيكون اكتمل فيها عند الجنين لانى كنت قرات ان سماع الجنين للقران اثناء الحمل بيربطه بالقران و بيسهل حغظه بعدكده و حاولت خلال الفترة الاخيرة اشغل المصحف كامل

3- قرات بردو ان الجنين و هو فى الرحم بيوصله صوت امه اوضح و اقوى من الاصوات الخارجية فكنت باحاول اقرأ القران بصوت مسموع و بردو الاذكار كنت باحاول اقولها بصوت مسموع

4-بعد ما ولدت بقى خلال الفترة الاولى كنت باشغلها قران فى التلفزيون او الموبايل بصوت عالى علشان تسمعه و كمان كنت بقرأه جمبها بصوت عالي

و اخليها تشوفني و انا باقرأ فى المصحف

5-من اول ما اتولدت باحاول اخليها تشوفنى و انا باصلي لوحدى او انا و باباها علشان ترتبط بالصلاة و اما تعيط اقولها لازم تسيبي ماما تصلي علشان ربنا يحبها و يدخلها الجنة

6-باخليها تسمع الاذان فى التليفزيون و اخليها تسمعنى و انا باردده

7-اما نيجي نصلي انا او باباها كنا نقولها الله اكبر كزا مرة لحد الحمد لله دلوقتى اما نقول كده تسكت و تبطل عياط و تعرف ان احنا هنصلي و تعد تتفرج علينا ☺

و اول ما اسلم الاقيها بتبصلي و تبتسم و تعرف انى خلصت صلاة ☺

8-بردو ااحيانا باقرأ لها الاذكار بصوت عالي

9-قبل الاكل نقول بسم الله و بعد الاكل الحمد لله

10- اما تعطس اقولها يرحمكم الله و اقولها قولي الحمد الله 

دي شوية حاجات بسيطة بس بتثبت فى عقل الطفل وتخليه يعرف ان دي حاجات اساسية في حياتنا زي الاكل و الشرب و اللعب فهتسهل علينا مهمة تعليمهم بعد كده

ربنا هب لنا من ازواجنا و ذرياتنا قرة اعين و اجعلنا للمتقين اماما

المفهوم الصحيح للتربية

السلام عليكم و رحمة الله و بركاته

كل اب و ام ربنا بيرزقهم بطفل بيفرحوا بيه و بيفرحوا باحساس الامومة او الابوة
و بيتمنوا انهم يربوهم احسن تربية

بس يا ترى ايه هى تربية الابناء من وجهة نظرنا؟

هل هى الاكل و الشرب و العناية الشخصية و بس؟

طيب ما كل الكائنات الحية بتعتنى بصغارها كده فى الفترة الاولى من حياتهم

طيب هل هى توفير مستوى مادى و اجتماعى كويس و ندخلهم مدارس كويسة؟

اكيد ده مهم بس مش هى دى بردو التربية

التربية تشمل  الحاجات الى قلتها بس هى مفهومها اوسع من كده بكتير

التربية من وجهة نظري هى تنشئة انسان سوي  نفسيا 

قادر على الاعتماد على نفسه و مواجهة الحياة

و غرس فيه الدين و القيم و الاخلاق 

يعنى مش معنى انى أكلت و لادى و حميتهم و نيمتهم و زعتقلهم ووديتهم المدرسة و صرفت عليهم ان كده ربيتهم

لازم يكون عندى اهداف اعلى من كده و انا باربي اولادى
بالنسبة لي حطيت اهداف نفسي احققها من خلال تربيتى لبنتى ان شاء الله


1- فهم دينها و عقيدتها بشكل صحيح و تطبيقه بشكل صحيح -و ده طبعا تدريجيا على حسب كل سن-
2-الاعتماد على النفس فى شئون حياتها و النقطة دى لازن تتنمى من صغرها
3- تكون سوية نفسيا 
4-تعليمها الاخلاق و القيم الحميدة و ده بردو لازم من الصغر
5-الاهتمام بتثقيفها وبتعليمها العلوم الدنيوية على حسب قدراتها و ميولها

طيب الاهداف دى تتحقق ازاى؟؟

1- الاهتمام بصحتها و تغذيتها منذ الصغر و ده طبعا يلزمه انى اقرا و اتعلم و اسال
2-اكون انا و باباها قدوة ليها دينيا و اخلاقيا لان الطفل بيحب التقليد و اسهل طرق التعليم انك تكون قدوة
3- الاطلاع على كل جديد فى مجال التعليم و التربية و محاولة تطبيقه فى الواقع
4-توفير بيئة صحية لنموها و تطورها و استقرارها النفسي

دى طبعا اساسيات و كل حاجة منهم تشمل تفاصيل كتير

ابناءنا امانة ربنا هيسألنا عليها
لازم نجتهد اننا نطلعهم افراد صالحين فى المجتمع

ربنا هب لنا من ازواجنا و ذرياتنا قرة اعين و اجعلنا للمتقين اماما

ملابس المولود الجديد ...لكل ام منتظرة طفلها

من اول الحاجات الى بنفرح بيها اول ما نعرف خبر الحمل هى هدوم البيبي

و بيبقى نفسنا نعرف هو ولد ولا بنت علشان ننزل بسرعة نجيب اللبس

فعلا دى كانت من اكتر اللحظات الجميلة فى فترة الحمل و كانت لما بنوتى توحشني اطلع اللبس الى جبتهولها و افضل اتفرج عليه

هاتكلم النهاردة عن هدوم البيبي الى بيحتاجها اول فترة من واقع تجربتي

انا ولدت فى الشتا فطبعا هدوم البيبي بتختلف من الصيف للشتا

فى العادى المفروض الطفل يلبس اكتر من الكبير طبقة واحدة

طيب فى الشتا ايه هى الحاجات الى هنجيبها؟؟

4-6 سلوبيت شتوي للبيت

2 سلوبيت شتوي للخروج -فى الاول الخروج بالطغل بيكون شوية صعب وخصوصا فى البرد-

8-12 بنطلون قطن داخلى

4-6 فانلة كت

4-6 فانلة نص كم

4-6 فانلة كم

بورت شتوي

بطانية

2 كوفرتة

4-6 شرابات

طواقي

جوانتى -بس انا جبته و مستخدمتوش-

عدد من البافتات

عدد من الفوط الصغيرة

باشكير

لو فى الصيف بقى زودى عدد سلوبتات البيت و الخروج عن كده و مش هنحتاج من الداخلى غير الفانلات الكت

فى شوية ملاحظات على اللبس:

1-السلوبتات المقغولة من الرجلين بتصغر بسرعة على البيبي لانهم ما شاء الله بيطولو بسرعة اوى و بتضايقهم فى الحركة فمن رأيي المفتوحة احسن

2- مقاس زيرو متجيبوش منه كتير يعنى الحاجات الى قلتها دى هاتى مثلا حاجة واحدة زيرو و الباقي المقاس الاكبر لان الاطفال اول فترة بيكبرو بسرعة و كل اسبوع حاجات بتصغر عليهم

3- اللبس لازم يكون كله قطن مفيهوش اى حاجة بتشوك علشان بشرة البيبي حساسة اوى و مش مهم الماركة او السعر المهم الخامة لان كل حاجة اخرها اسبوع ولا اتنين لبس و بعد كده البيبي بيكبر عليها

4-السلوبتات لاااازم تكون بتتفتح من الرجل علشان سهولة تغيير الحفاضة و متضطريش كل غيار تقلعي اللبس كله

5- البيبي فى البداية بيلبس فانلة كت و نص و كم و بنطلون و السلوبيت من فوق و يتلف بالبطانية او يتحط فى البورت ده طبعا فى الشتاء

الفانلات الى ليها كباسين من تحت متكتروش منها علشان بتضايق البيبي

و السلام عليكم و رحمة الله و بركاته

اول شهر فى حياة الرضيع

السلام عليكم و رحمة الله و بركاته

هتكلم النهاردة عن اول شهر فى حياة البيبي ايه اهم السمات الى بتميز المرحلة دى و ايه المطلوب منى كأم علشان اساعد طفلي انه يطور من نفسه و يتأقلم مع الحياة الجديدة

مبدئيا كده لو حطيتي نفسك مكان الطفل اول ايام وجوده فى الدنيا هتتعاطفى معاه جدا...تخيلي نفسك فجأة بقيتي فى مكان غريب مش فاهمة حاجة و لا عارفة مين الناس الى بتشوفيهم ..و كمان مش قادرة تتواصلي معاهم لانك مبتعرفيش تتكلمي بلغتهم..كل حاجة بالنسبة ليكي جديدة و غريبة...اكيد محتاجة حد يطمنك و يحسسك بالامان..يحسسك انه فاهم احتياجاتك و هيحققهالك من غير ما تتكلمي..و لو لقيتي الشخص ده اكيد هتكوني عايزة تفضلي قريبة منه طول الوقت لان هو مصدر امانك...

و هى دى مهمتك فى الايام الاولى من حياة طفلك..

اول شهر بيكون مرهق شوية بالنسبة للطفل و الام

الطفل بيكون لسة مستغرب الحياة و مش قادر يتاقلم مع الحياة خارج رحم الام

و الام بتكون مجهدة من الولادة و الرضاعة و بكاء البيبي و قلة النوم فى الفترة الاولى خصوصا لو ام اول مرة فبيكون كل شيء بالنسبة ليها جديد

المطلوب منك الفترة دى الصبر و تحاولي ترتاحى قدر المستطاع كل ما تجيلك فرصة

رضعى البيبي و احضنيه و حسسيه بضربات قلبك لان دى من اكتر الحاجات الى بتطمن البيبي و بتحسسه بالامان

اهتمامات الطفل بتكون قليلة الشهر ده لكن اكتر حاجة بتشد انتباهه هى تامل الوجوه

افكار مقترحة:

 علقي لعبة فوق سريره

غني له لان الغناء بيهديهم

هزيه برفق

احضنيه

كلميه كتير

شغلي قران او اقراي له قران

ممكن تلجاى لاصوات الضوضاء البيضاء لتهدئته لما يبكي او مساعدته على النوم و هى بتكون اصوات زي صوت المكنسة او القطار او خرير المياه و فى تطبيقات على جوجل اسمها  white noise

اهتمى بالرضاعة الطبيعية و ملامسة الطفل لك اوقات كثبرة

قربي وشك منه و انتى بتكلميه و سيبيه يتامل ملامحك

حاولي متخليهوش يبكي كتير و سارعي لتلبيه احتياجاته حتى لا يشعر بانعدام الامان

و اخر الشهر الاول هتاخدى اول هدية من البيبي بتاعك هتنسيكي تعب الشهر كله

و هى اول ابتسامة حقيقية من طفلك

التغذية اول ستة اشهر

السلام عليكم ورحمة الله و بركاته

هتكلم هنا عن تغذية الطفل فى اول اربع او ست شهور و الى هي قبل ادخال الطعام الصلب الى نظامه الغذائى

طبعا افضل شيء الرضاعة الطبيعية بتكون صعبة شوية فى البداية لانها حاجة جديدة علينا احنا الاتنين بتكون مؤلمة فى احيان كتير لكن لاااااااازم الصبر و الاحتساب للتعب ده كله..ايه المشكلة اما اجى على نفسي شوية و اتحمل التعب ده علشان صحة بنتى او ابنى

10 نصائح من تجربتى مهمة للرضاعة الطبيعية:

1-لازم فى البداية تاخدى النية و القرار انك متديش لبن صناعى و ان شاء الله ربنا هيعينك

و تعرفى ان الموضوع بسيط جدا بس كل حاجة فى بدايتها متعبة شوية انما لما تمر الفترة الاولى هاتلاقى الموضوع سهل جدا و ممتع جدا و مش محتاج كل التعقيد الى بنكون حاسين بيه فى الاول

2-اقرأي كتيرعن الرضاعة الطبيعية و فوائدها ليكي و للطفل و عن الطريقة الصحيحة ليها

و من فوائد الرضاعة الطبيعية انها بتدى البيبي مناعة و اجسام مضادة مش موجودة فى اللبن الصناعى..ملائمة اكتر للطفل ..معقمة..سهلة لا تحتاج تحضير..متوفرة فى كل وقت..مكونات اللبن بتتغير مع تغير عمر الطفل..انسب لمعدة الطفل

غيرانها بتحسس الطفل بالقرب من امه و تحسسه بالامان و الدفء الى بيكون محتاجهم

و بتكون رابطة قوية بين الام و الطفل

اما باالنسبة لفوائدها ليكي انها بتقي من سرطان الثدى..و بتساعدك تنزلى الوزن الى اكتسبتيه اثناء الحمل

غير انها بتديكي احساس رائع بالامومة

3-اول ما تفوقى من الولادة حاولى ترضعى البيبي و يا ريت تكون الرضاعة اول حاجة ياخدها علشان ميرفضهاش بعد كده

4-كمية اللبن فى البداية تكاد لا ترى متقلقيش هى الكمية البسيطة دى الى الطفل اول ايامه بيحتاجها متياسيش وتلجأى للصناعى

5-متديش اللبن الصناعى غير لو فعلا مفيش لبن او ان البيبي وزنه مش بيزيد مع العلم ان البيبي اول عشر ايام وزنه هيقل لانه هيفقد بعض السوائل الى كانت فى جسمه

6-ساعدى البيبي يخرج الهواء الى بلعه مع الرضاعة اثناء و بعد كل رضعة علشان تتجنبي المغص و علشان ميرجعش وده بالخبط بالراحة على ضهره لحد الهوا ده ما يخرج

7-المغص و الانتفاخ بيحصل مع الرضاعة الطبيعية و الصناعية لكن مع الصناعى اكتر عن تجربة فى ادوية دينتينوكس اوسايمثيكون بس يا ريت تتاخد عند الضرورة فقط مش عمال على بطال وهى مفيش منها اى ضرر لانها مش بتمتص 

8-اهتمى بالحالة النفسية بتاعتك لانها بتاثر على الرضاعة و كمية اللبن و اهتمى بالسوائل و المياه و التغذية الصحيحة

9-من وجهة نظرى ان الرضاعة تكون عند الطلب افضل من تنظيم الرضاعة و البيبي مع الوقت هوالى هينظمها لنفسه و ده لسببين:

الاول:ان كمية اللبن بتزيد مع زيادة عدد مرات الرضاعة

الثانى:لان الرضاعة مش بس بتشبع جوع الطفل لا كمان بتعمله اشباع عاطفى 

و فى كمان سبب ان فى اطفال بتدلع ومش بترضع كله مرة واحدة فمش بتشبع كويس

اما الرضاعة الصناعى فطبعا ممكن تنظيمها عادى

10-غطاء الرضاعة جميل اوى ومفيد و بينفع اوى برا البيت وسهل انك تعمليه بنفسك

الرضاعة الطبيعية هى اجمل و اقرب وقت بيجمع بين الام و الطفل..استمتعى بهذا القرب و استفيدي منه فى زيادة التواصل بينكما