هنتكلم ببساطة عن اضرار التليفزيون للأطفال الصغيرين خاصة تحت السنتين
لو انت اتعودتي تشربي الشاي فيه خمس معالق سكر ..كل يوم تشربيه كده..و بعدين حد قدمهولك بمعلقة واحدة هتقدري تشربيه؟
اكيد طبعا لا ..و هتحسي انه مالوش طعم
نفس الكلام بالنسبة للطفل الصغير الي بنسيبه قصاد التليفزيون...بيشوف كم كبير جدا من المثيرات البصرية الي اصلا فوق مستوى استيعابه...مخه بيتعود على الصورة السريعة و الالوان القوية و الأصوات العالية..هاتلاقيه طبعا قاعد متنح للتليفزيون و مش بيتلفت عنه..و صناع البرامج بتاعت الأطفال بيكونو قاصدين انهم يعملوه بالطريقة دي الي تشد االطفل عن كل الى حواليه..
هتيجي بعد كده تديله نشاط علشان ينفذه مش هيبصلك أصلا و لا هيلتفت للنشاط لأنه حاسس انه زي كوباية الشاي الي فيها معلقة سكر واحدة
هيجي الطفل ده يدخل المدرسة مش هيركز في الكلام الي بيتقاله و مش هيرضى يسمع المدرسين لانهم مش بيخاطبوه بنفس الكم من المثيرات الي مخه اتعود عليها..
كمان الابحاث اثبتت ان في علاقة بين تطور مخ الطفل و ايده..
يعني ايه الكلام ده؟
يعني لازم الايد تشتغل في حاجة علشان المخ يتطور...
و في منهج المنتسوري ماريا منتسورى بتقول اليد اداة المخ..
و عرفنا ان المخ بيتطور بنسبة كبيرة جدا اول سنتين من عمر الطفل..
يبقى لو الايد مشتغلتش الفترة دي المخ هياتأثر طبعا...
بالنسبة لتعلم اللغة و الكلام من التليفزيون...
عملية التعلم علشان تنجح لازم يكون الطفل ليه فيها دور ايجابي...يعني لازم يكون في تفاعل
طبعا الطفل بيقعد قصاد النليغزيون متلقي سلبي ..
و علشان كده دايما الاطفال الي ببيقعدوا قصاد التليفزيون فترة طويلة بيحصلهم تاخر لغوي..او مشاكل في النطق نظرا لسرعة الكلام في برامج الاطفال او عدم وضوحه...
الطفل علشان يتعلم في اول سنتين لازم يستخدم ايده و حواسه..
يبقى هنا اضرار التليغزيون
بتاثر على تطور مخ الطفل و تطور نموه بشكل عام
بتعمل تاخر لغوي و اضطراب في النطق
فرط حركة و تشتت انتباه
ممكن تعمل سمات توحد..لانها بتعزل الطفل عن المحيط الي حواليه..و بتقلل النواصل الاجتماعي..
كل الأضرار دي في حالة انك اخترت برامج تعليمية..هادفة..مناسبة لسنهم..
لكن بقى لو اخترتي اي برامج كارتون او قنوات اطفال و خلاص ضيفي على الاضرار دي
العصبية
العنف
اكتساب عادات خاطئة
اكتساب معتقدات خاطئة
انا عارفة ان التليفزيون بيخفف عنكم كتير و بيشغل الطفل لفترة..
بس نبجي على نفسنا شوية و منسبهمش قدام التليفزيون بالساعات..و نسيبهم يكبروا و يتطوروا بالطريقة السليمة..
#أضرار_التليفزيون
زوجة وأم وصيدلانية مهتمه بالتربيةوالتعليم بنظام منتسوري .. ، ، ،
