المشكلة فينا مش فيهم ..5 التعلق و قلق الانفصال

#المشكلة_فينا_مش_فيهم

التعلق خامس مشاكلنا

هي بتبدا اصلا في عمر 6 او 7 شهور

و بنسميها فترة القلق من الانفصال

ممكن تعدي بسلام في وقت قليل

و ممكن تطول شوية

الشكوى الدائمة..ابني دايما ماسك فيا..مش عاوز يسيبني..كل ما بيقعد لوحده بيعيط جامد

مش عارفة اعمل منه حاجة في البيت..و شكاوي مابتنتهيش 

فترة القلق من الانفصال هي فترة الطفل بيدرك فيها ان مامته حد منفصل عنه..و ممكن تسيبه و تمشي

بيخاف اوي احسن مترجعش تاني..هو مش عارف يفهم انها هتروح و تيجي كمان شوية

ذاكرته ضعيفة مش بيعرف يفتكر انها كل ما بتسيبه بترجعله

بيعيط جامد لانه حاسس انها هتبعد ومش هترجع

طيب طول الفترة دي بتتوقف على حاجتين

الاولى هي الاشباع النفسي و العاطفي للطفل

و ده بان الام تشبعه من وجودها معاه...متسيبهوش لوحده فترات يعيط فتاكدله فكرة انها بتسيبه لوحده

حاولي متبعديش عنه و تسيبيه يعيط..و لو هتسيبيه يكون مع حد و الحد ده يلاعبه و يشغله علشان ميحسش بغيابك

الطفل اول ما يطمن لوجودك الدائم و انه وقت ما يحتاجك هايلاقيكي جنبه

من نفسه هيبدا يبعد عنك واحدة واحدة

هيزحف بعيد عنك شوية و يبص وراه..يلاقيكي قاعدة ..ابتسميله و طمنيه ..هيفضل يبعد حبة حبة و كل شوية يتطمن على وجودك ..

خلى الخطوة تيجي منه اما يكون مستعد ليها

جنى سنة و اربع شهور بقت تدخل اوضتها تلعب لوحدها حبة صغيرين..بتكون عارفة مكاني و عارفة انها هاتلاقيني وقت ما تحتاجنى

لو الطفل محسش بالامان لوجودك..للاسف الفترة دي هتطول معاه..و تعلقه بيكي هيزيد لانه عارف انه اما بيحتاجك مش هايلاقيكي

الحاجة التانية الي بتأثر هي طبيعة الطفل نفسه..في اطفال بتكون حساسة زيادة..محتاجة دايما تكون في تواصل جسدي مع مامتها..مش بتحس بالامان غير و ماما شايلاها..هي طبيعة تكوينهم كده..

فمنقارنش طفل بطفل و لا حتى أخوه..كل طفل حالة مستقله

نصائج سريعة للتغلب على الفترة دي

●لو الطفل عاوزك جنبه يبقى هو محتاجك ..متسيبيهوش

●اخرجي بالطفل كتير خليه ميخافش من الناس ..خليه يلعب مع اقاربه و مع اطفال تانيين

●احضني الطفل كتير و كلميه و عينك في عينه و اشبعيه عاطفيا

●لو اضطريتي تسيبيه مع حد اشرحيله السبب و متخليهوش يتفاجيء بغيابك

●خلي المبادرة بالانفصال تيجي من الطفل و شجعيه عليها

و حاجة اخيرة في الموضوع ده

الانسان مخلوق اجتماعي..لازم يتواصل مع بشر زيه

و معظم اطفالنا مقدامهمش غير الام ..فطبيعي هيكون عاوز طول الوقت يكون معاها

#المشكلة_فينا_مش_فيهم

المشكلة فينا مش فيهم 1 طفلي كثير الحركة

هابدأ النهاردة معاكم مجموعة من البوستات عن اكتر المشاكل الى بتواجهنا مع الطفل بعد سنته الاولى

اول ما الطفل بيبدأ يمشي و يتحرك و ينطلق في البيت

كل الامهات بتبدأ تشتكي و تلوم على الطفل أنه شقي و مش بيقعد ساكت

بيتنطط هنا و هناك و مش بيسمع الكلام

و نبدأ في كل حتة نقول ابني او بنتي اشقياء جدا و مبيقعدوش

طيب قبل ما نلوم عليهم نحط نفسنا مكانهم

انت لو اشتريتي جهاز جديد هتعملي ايه؟

هتفضلي طول النهار و الليل تجربيه و تشغليه و تختبري كل امكانياته

طيب الطفل ده الى اكتسب مهارة جديدة و هي الزحف او المشي او الجري بردو عاوز يستخدمهم طول الوقت

عاوز يفرح بنفسه و هو بيتحرك لوحده مش معتمد عليكي

عاوز يجرب و يختبر قدراته الجديدة و يشوف نفسه يقدر يعمل ايه

عاوز يمرن نفسه و عضلاته علشان مهاراته و تحكمه في حركته يزيد

غير ان كل حركة الطفل بيعملها بتساهم في تطور مخه

الموضوع ده بيحصل بدون وعي من الطفل بالكلام الى انا قلته و لكن ده برنامج ربنا سبحانه و تعالى حاطه جوا الطفل

غريزته و فطرته هي الي بتخليه عمال يتحرك و يتشعبط  و يتنطط طول الوقت

طيب ايه دورنا كأهل في الموضوع ده ؟

اولا : متتهميش الطفل بالشقاوة و متتضايقيش من حركته

ثانيا :شجعيه أنه يتحرك و يقوم بحركات جديدة

ثالثا : خلي البيت كله مكان امن لحركة الطفل افرشي سجاد علشان لو وقع، لو حاجة خطيرة ابعديها خالص عن الطفل

رابعا : شجعي الطفل على الجري و التنطيط و التسلق و اعمليله تحديات اكبر كل ما يعدي مرحلة

شجعيه يطلع على السرير و الكرسي لوحده، اجري و اتنططي معاه، العبي معاه استغماية

خامسا : خرجي الطفل في اماكن واسعة زي النوادي او الحدائق و سيبيه ينطلق بدون ما تقيدي حركته

سيبيه يلعب و يجري و يطلع الزحليقة لوحده 

سادسا: لو الطفل وقع وقعة بسيطة بلاش تبينيله انك مخضوضة اوي و سيبيه يعتمد على نفسه و قوليله حصل خير علشان ثقته بنفسه متتهزش

سابعا : افرحي ان طفلك نشيط و صحته كويسة و بيلعب و يتنطط

#المشكلة_فينا_مش_فيهم